برا لقرقارش خيرلك

اول حاجة نقولوها احني الليبيين اول ما نتكلمو علي مرض نفسي او مرض عقلي (برا لقرقارش خيرلك). قرقارش هي اختصار لمستشفي الأمراض العقلية الموجود في حي الأندلس و معروف من زمان بإسم مستشفي قرقارش. الصورة اللي بتخطر علي بالك لشخص عنده مرض عقلي او نفسي زي اللي نشوفوا فيه فالأفلام، مكان يخوف، ناس تصيح او شخص ميكلمش في حد و ديما هايم في عالم تاني.

الي الان لو فيه حد كبير او صغير مريض بمرض نفسي او عقلي لازم يقعدوا يعلقوا عليه او يتسهوكوا علي خوته و خواته فالمدرسة او فالشارع و تقعد عيلته تحت دائرة القيل و القال فالجيهة و يهدرزوا عليه في لمات العشية او الضحوية عند الجيران. المجتمع الليبي و قانون العادات و التقاليد اللي يحكمه مانع تقبل الكلمة بحد ذاتها و بقدرة قادربالشوية تحولت لكلمة مهبول، للأسف حتي الجانب التعليمي مش مداير دور في التركيز علي الموضوع هذا و لو جابوا سيرته في اي مجمع، الوجوه تتغير و الكلام ينقص و كل حد يلهي باللي عنده و فالأخير يغيروا الموضوع.

المدة اللي فاتت، زوز شخصيات اجنبية "مشهورة" و ليها اسمها في الصناعة انتحروا و في عمر كبير. الشخصية الآولي للمصممة كيت سبيد و انتحرت علي عمر ٥٤ و الثاني هو انثوني بورداين عن عمر ٦١ و هو شيف و صاحب أشهر برنامج علي سي ان ان من خلاله قدر يتعرف علي ثقافات بلدان عن طريق ماكلتهم و في ٢٠١٣ دار حلقة في ليبيا. الفكرة اللي خلتني نفكر و نسأل نفسي علاش شخصيتين بالشهرة و المال و الاهتمام اللي عندهم فكروا ينتحروا!! الشي اكبر من سلطة و فلوس، و كان دل علي حاجة ف انه الشخصيتين هادوا كانوا في حرب و تضارب مع نفسهم و تكتمهم لسنين و ممكن ما كانش في من يسمعهم الشئ اللي خلاهم فالأخير ينتحروا لانه النفس غلبتهم.

المجتمع الغربي و ان كان متطور و مداير أبحاث و مراكز علاج للامراض النفسية و العقلية. فالسنين الأخيرة, نسبة الانتحار زادت في امريكا مثلا و أكيد ليها أسباب هلبا اجتماعية و فكرية و غيرها بالرغم من الثورة الحضارية اللي عندهم بس مزاللهم شوط بس احني مزالنا أشواط لأنه لازم من وجود رد فعل. في رأي, مزال الجانب التوعوي للموضوع هذا مش واخد حقه. لازم يربطوا التعليم بالتوعية و التعريف بالامراض النفسية و العقلية و الأسباب الممكن توصل الانسان للمرض. السنة اللي فاتت مجموعة شباب ليبيين داروا معرض فنون اسمه (نفس) للتوعية بالامراض النفسية و العقلية و كان ليه صدي كبير و ان كان علي فئة الشباب بشكل خاص.

قانون العادات و التقاليد احتكر المجتمع بطريقة غلط و هلبا أشخاص وصلوا للجهل و للأسف سبب خلل كبير يبيله هلبا بش يتصلح. لازم يكون فيه توعية كبيرة علي وسائل التواصل الاجتماعي لانه بدي ليها تأثير كبير بين الناس و اضافة ورش عمل او حلقات نقاش في مساحات العمل اللي توفرت في هلبا مناطق توا و بدت تجذب فالناس بشكل كبير.

الصحة النفسية و العقلية مهمة جدا و لازم كل شخص يهتم بيها زيها زي الصحة الجسدية. النفس تمر بتقلبات خلال فترة حياتنا و هذا كله ينعكس من الظروف اللي نمروا بيها و تأثيرها السلبي يللي ممكن يقعد معانا لفترة طويلة و يتطور لشئ معادش نقدروا نتحكموا بيه. مش كل شخص عنده القدرة انه يحل الصراع الداخلي بروحه، في من يحتاج لمساعدة بش يقدر يطلع من الأزمة اللي يمر بيها و مش ديما 'خللوه بروحه، فترة و تفوت'.